Saga Kötlu og rætur hennar

Árið 1963 þann 9. nóvember var fyrsti reglulegi fundurinn samkvæmt
reglum Kiwanishreyfingarinnar haldinn ("in formation")  þ.e. klúbbur í aðlögun . Voru þetta
22 af 30 sem samþykkt höfðu að gerast stofnfélagar fyrsta Kiwanisklúbbsins á Íslandi.

Þeir átta sem ekki mættu voru veikir eða fjarverandi erlendis. Einar A Jónsson,
aðalféhirðir Sparisjóðs Reykjavíkur stýrði fundi og var hann síðan kjörinn fyrsti forseti
hins nýja klúbbs. Þarna var ákveðið að væntanlegir Kiwanisklúbbar hér á landi skyldu
bera nöfn íslenskra eldfjalla og var síðan samþykkt, að þessi fyrsti klúbbur hreyfingarinnar á landinu skyldi bera nafn þekktasta eldfjallsins og
heita Kiwanisklúbburinn Hekla. 

Eftir tveggja mánaða starf sem klúbbur í aðlögun var formlegur stofnfundur
("organization meeting") haldinn 14.janúar 1964. 
Frá þeim degi hefur hann verið fullgildur klúbbur Kiwanishreyfingarinnar, og er hann
hinn níundi í röð Evrópskra Kiwanisklúbba. 
Klúbburinn óx hratt í byrjun og voru félagar orðnir um 50 í maí 1964 og um 75  í október
sama ár. Og með vaxandi ásókn manna um inngöngu í klúbbinn gerðu menn sér grein
fyrir því, að full þörf væri fyrir annann Kiwanisklúbb.

Upphaf Kötlu.
Hinn 13. nóvember 1965 var haldinn fyrsti undirbúningsfundur að stofnun klúbbs nr. 2 á Íslandi Kiwanisklúbbsins Kötlu í Reykjavík, réttum tveim árum eftir að fyrsti fundurinn í
Heklu hafði verið haldinn. Formlegur stofnfundur Kötlu var svo haldinn 31. mars 1966 
og er klúbburinn hinn 25. í Evrópu, sem þýðir að á þeim tveim árum, sem liðin voru frá
stofnun Heklu höfðu 15 Kiwanisklúbbar bæst í hópinn í Evrópu. Með stofnun Kötlu
hófs líklega mesta vaxtaskeið í sögu Kiwanis á nokkrum stað í heiminum.

Fyrsti forseti Kötlu var Páll H. Pálsson. En Kristinn Arason er einn af stofnendunum
sem eru í klúbbnum í dag ásamt Gísla Kristjánssyni. 
Margt hefur á dagana drifið og má segja að mörg Kötlugos hafi átt sér stað síðan
klúbburinn var stofnaður.

Þeir klúbbar sem Kötlufélagar hafa staðið að stofnun eru:
Helgafell í Vestmanneyjum 1967
Eldborg í Hafnarfirði 1969
Búrfell á Selfossi 1970;
Keilir í Keflavík 1970
Nes á Seltjarnanesi 1971
Torshavn í Færeyjum 1981

Starfsemi Kötlu.
Í fyrstu var klúbburinn með hádegisfundi á miðvikudögum. Og var þá með tæplega 60
félaga þegar best lét. En með breyttu þjóðfélagsmunstri reyndist erfiðar með hverju árinu
að hafa hádegisfundi í hverri viku. Var svo um tíma að aðeins 8 félagar mættu á fundi og
með nesti með sér. Þá var ákveðið að endurreisa klúbbinn og færa fundi yfir á kvöldin
og aðeins hálfsmánaðarlega. Síðan hefur klúbburinn verið í nokkuð góðu jafnvægi og
hefur verið reynt að halda uppi líflegu starfi með um 30 - 40 félögum. 
Árið 1991 var talan komin niður í 26 félaga. En þá var hafist handa við að afla félaga.
Gekk það vel og síðustu tíu árin hafa Kötlufélagar verið um 40 talsins.

Fjáöflun og styrkveitingar.
Í gegnum tíðina hefur Katla átt hugmyndaríka félaga sem hafa fengið góðar hugmyndir
til fjáraflana til styrkveitinga. Í fyrstu var sælgætissala fyrir jól og páska helsta fjáröflunar
leiðin. En síðustu árin hefur Katla til fjáröflunar fyrir styrktarsjóð séð um rekstur klukkunar
á Lækjartorgi samkvæmt samningi við Reykjavíkurborg þar um, og selt
uppsettningu auglýsinga sem á hana hafa verið settar. Hafa Kötlufélagar nánast
endurbyggt klukkuna frá grunni. Að fá auglýsingar hefur gengið svona upp og niður en
nú síðustu ár hefur klúbburinn notið góðs af samningi við Ölgerð Egils, N2, Erlingsen og
66°norður. Í fyrstu voru sjúkrahús í Reykjavík styrkt með ýmsum tækjum, einnig var
félag heyrnleysingja styrkt. En stærstu og merkustu styrkveitingarnar sem Kötlufélagar
hafa staðið að eru gjöf sem dómsmálaráðaneytinu var gefin 1971 að upphæð ein miljón
króna til kaupa á fyrsta hassleitarhundinum sem til Íslands kom, og árið 1977 var stuðlað
að kaupum á sérbúinni bifreið fyrir hjólastóla fólk sem var upphafið af ferðaþjónustu fatlaðra. 
Árið 1982 smíðuðu Kötlufélagar veiðipalla fyrir hjólastólafólk og gáfu veiðifélagi
Elliðavatns. Árið 1985 var háls, nef og eyrnadeild Borgarspítalans gefið jafnvægis
og svimaleitartæki, og 1996 var Blindrabókasafni Íslands gefið 24 rása hljóðblönunartæki 
til notkunar á upptöku hljóðbóka. Þar að auki hefur Katla árlega í samráði við
presta í Reykjavík látið af hendi rakna fjárupphæðir til gjafakorta sem úthlutað hafa
verið bágstöddum fyrir jólinn. Einnig hefur fé verið gefið til joðverkefnisins
og Hjálparstofnunar Kiwanis

Ýmis embætti utan klúbbsins.
Ekki má gleyma því stafi sem félagar Kötlu hafa tekið þátt í fyrir Kiwanis utan Kötlu.
Þeir hafa starfað í ýmsum embættum á vegum kiwanis utan klúbbsins.

Páll H. Pálsson var Svæðisstjóri Íslands 1969 - 1970,
Evrópuforseti 1971 - 1972.

Kristinn Arason var Umdæmisféhirðir 1986 - 1987
og Svæðisstjóri Þórs 1982 - 1983

Árni H Jóhannsson var umdæmisféhirðir 1988 - 1989
og Svæðisstjóri Eddu 1992 - 1993

Kristinn Albertsson var Svæðisstjóri Sögu 1973 - 1974

Hilmar Svavarsson var Svæðisstjóri Þórs 1987 - 1988

Þorlákur Jóhannsson var Svæðisstjóri Eddu 1999 - 2000

Hjálmar Hlöðversson var Svæðisstjóri Eddu 2007 - 2008

Helgi Straumfjörð var Svæðisstjóri 2008 - 2009

Sigurbergur Baldursson hefur verið formaður Internetnefndar umdæmisins Ísland Færeyjar
hefur hann haldið um vef umdæmisins, Kötlu og fleiri klúbba frá árinu 1996 en Ísland var
með fyrstu Kiwanisklúbbum í heiminum til að setja um vefsíðu og ganga þannig inn í nýja
öld samskipta.

Lokaorð,
Það má segja að starfið hjá Kötlu sé nokkuð hefðbundið. Fundir eru hálfsmánaðarlega
og reynt er að hafa sem mest samstarf við aðra klúbba. Á síðustu árum hefur kröftum
verið beitt til stuðnings við þá félaga sem fyrir eru í klúbbnum frekar en að stuðla að
stofnun nýrra klúbba. Góður félagsandi er í klúbbnum og reyna félagar að hittast og
gera sér dagamun sem offtast og ekki má gleyma  í Heiðmerkur lundinum sem klúbburinn
á, og í júnímánuði er farið árlega með fjölskylduna þangað til að planta trjám og hlúa að
eldri plöntum og gera sér glaðan dag. Í raun er reynt að hafa starfið líflegt og byggja á jákvæðu hugarfari því þá líður öllum vel og ánægja er af starfi og samveru. 
Hvetjum við alla félagslynda menn til að kynna sér betur starfsemi okkar og myndum við taka vel hverjum þeim ærugóðum manni sem vill hafa samneyti við okkur.

Sigurbergur Baldursson 1996. Uppfært 2010